ლენტეხის მუნიციპალიტეტში 22-მეგავატიანი “ცხენისწყალი 1 ჰესის” მშენებლობა წელს დაიწყება
- ეკონომიკა
- აგვისტო 16, 2024
- 37
ლენტეხის მუნიციპალიტეტში, მდინარე ცხენისწყალზე 22 მგვტ დადგმული სიმძლავრის ჰიდროელექტროსადგურის – “ცხენისწყალი 1 ჰესის” მშენებლობა მიმდინარე წელს დაიწყება.
როგორც პროექტის განმახორციელებელი კომპანიის – შპს „ჰაიდრო ინვესტ ჯი ეი“-ის დირექტორმა, გიორგი მარგებაძემ BMG-სთან განაცხადა, პროექტის საინვესტიციო ღირებულება 30-დან 35 მლნ დოლარამდეა და ამჟამად დაფინანსებასთან დაკავშირებით ბანკთან მოლაპარაკება დასკვნით ფაზაშია.
როგორც გიორგი მარგებაძე აღნიშნავს, პროექტმა პირველ CFD აუქციონში გაიმარჯვა, გარანტირებული შესყიდვის ტარიფის არსებობამ კი პოზიტიური როლი ითამაშა დაფინანსების მოზიდვის პროცესში.
“ამ პროექტმა პირველ CFD აუქციონში გაიმარჯვა, რომელშიც 6.85 ცენტი დაჯდა მედიანური ტარიფი. პროექტს ექსპერტიზა გავლილი აქვს, როგორც სახელმწიფოს, ისე ბანკის მხრიდან, დადებითი დასკვნებია ყველგან, გარემოს ზემოქმედების შეფასების დასკვნა გაცემულია, საჯარო განხილვები ჩატარებულია და მოსახლეობა ელოდება პროექტის დაწყებას. დაგვრჩა ბანკთან მოლაპარაკებები ბოლომდე მიყვანა, ფაქტობრივად, ბოლოში ვართ გასული, რომ დაფინანსება შეიკრას. მშენებლობის დაწყება დაახლოებით თვე-ნახევარში, მაქსიმუმ ორ თვეში იგეგმება”, – ამბობს გიორგი მარგებაძე.
მისივე თქმით, მშენებლობის ხანგრძლივობა, ექსპლუატაციაში მიღებამდე, დაახლოებით წელიწად-ნახევარია. გიორგი მარგებაძე ეკონომიკურთან ერთად პროექტის სოციალურ მნიშვნელობაზეც ამახვილებს ყურადღებას.
“სერიოზული სოციალური პაკეტები გვაქვს ადგილობრივი მოსახლეობისთვის შეთავაზებული, როგორც დასაქმების, ისე ინფრასტრუქტურული კუთხით. ენერგეტიკული მიმართულებით ქვეყანას სერიოზულ ობიექტს შევძენთ, რომელიც ელექტროენერგიის გამომუშავების, იმპორტდამოკიდებულების შემცირების ნაწილში თავის სოლიდურ სიტყვას იტყვის”, – აღნიშნა გიორგი მარგებაძემ.
